Bloggfærslur mánaðarins, október 2008

Samfylking er eina vonin

Ég hef bent á það í fyrri færslum að eina von almennings í þessu landi er að Samfylkingin hafi styrk og þor til að stjórna endurreisninni. Það er gífurlega mikilvægt að það verði ekki Sjálfstæðisflokkurinn. Honum er ekki treystandi til þess að standa fyrir þeim úrbótum á íslensku lýðræði, jafnrétti og jafnræði sem þörf er á. Framtíð Samfylkingarinnar veltur líka á því að hún sýni að hún ráði við þetta verkefni.

Samfylkingin hefur lítið sem ekki komið að stjórn efnahagsmála fram til þessa.  Nú er hennar tími runninn upp. Ef hún bregst mun skapast tómarúm sem verður fyllt af - Sjálfstæðisflokknum. Aðrir flokkar hafa ekki burði til þess.

Myndbandið og textinn sem fylgir frétt mbl.is gefur til kynna að Samylkingin muni kikna. Hins vegar er engan vegin víst að fréttin gefi rétta mynd af því sem fram fór á Alþingi. Það væri ekki í fyrsta skipti sem fréttir þar eru litaðar af sérhagsmunum Sjálfstæðisflokksins og "hans" manna. 


mbl.is Ekki benda á mig
Tilkynna um óviðeigandi tengingu við frétt

Sjálfstæðisfokkinn burt

Sjálfstæðisflokkurinn hefur í síauknum mæli tekið upp vinnubrögð sem kennd eru við "neo-cons" eða GWB. Á 17 ára valdaferli flokksins má sjá hvernig flokkurinn hefur tileinkað sér hrokafullan málflutning samfara því að hann hefur lagt til hliðar lýðræðisleg vinnubrögð og látið sérhagsmuni ráða. Dæmin eru ótalmörg:

  • Fjölmiðlalög
  • Dómararáðningar
  • Prófessoraráðningar
  • Stríðsþátttaka
  • Lagðar niður "óþægar" stofnanir

Röksemdafærslan fyrir aðgerðum flokksins hefur lýst þvílíkum hroka að leitun er á öðru eins. Þar má t.d. nefna að ekki þurfi að fara eftir gildandi lögum af því að þau "séu börn síns tíma," að dómnefndir vegna ráðningar í dómarastöður séu minna virði en einkavinaráðgjöf og prívat skoðanir einstaka ráðherra eða að þjóðinni komi ekki við hvort hún er látin styðja ólöglegt árásarstríð í fjarlægum heimshlutum.

Framundan eru gífurlegar eignatilfærslur í íslensku þjóðfélagi. Fyrst munu stjórnvöld skipa stjórnir og bankastjóra  í þjóðnýttum bönkum, en síðan munu bankarnir verða eikavæddir á ný. Fjöldi fyrirtækja munu verða gjaldþrota og þá ríður á miklu að nýir menn taki við rekstrinum svo framleiðsla stöðvist ekki. Sjálfstæðisflokkurinn mun kappkosta að koma sínum mönnum á rétta staði þannig að "þeirra" menn fái aðgang að lánsfé til að kaupa upp þjóðfélagið, - að nýju.

Í endurreisninni sem framundan er  verðum við að leggja áherslu á aukið lýðræði og meira gegnsæi. Það er t.d. alveg fráleitt að kjósendur skuli ekki fá vitneskju um það hverjir fjármagna stjórnmálaflokkana. Nú reynir á að Samfylkingin sýni frumkvæði. Samfylkingin hefur verið í stjórnarandstöðu frá því hún var stofnuð og ber því litla ábyrgð á ástandinu núna. Hún benti meira að segja á misstökin í hagstjórninni í rituðu máli og töluðu fyrir síðustu kosningar. Henni ber því að leiða endurreisnarstarfið og næstu mánuðir munu skera úr um það hvort Samfylkingin verður leiðandi afl í íslensku þjóðfélagi eða ekki.


mbl.is Þjóðin í gíslingu Sjálfstæðisflokksins
Tilkynna um óviðeigandi tengingu við frétt

Á Sjálfstæðisflokkurinn að bjarga okkur?

Í sautján og hálft ár hefur Sjálfstæðisflokkurinn farið með stjórn efnahags- og fjármála Íslands. Í 12 ár hafði hann Framsóknarflokkinn sér til fulltingis og satt að segja nenni ég varla að tilgreina sérstaklega forsætisráðherratíð Halldórs Ásgrímssonar því fæstir gerðu sér grein fyrir að tveir flokkar sætu í ríkisstjórn. Enda skræmti drengjaliðið í Sjálfstæðisflokknum undan því að ráða- og flokksmenn Samfylkingarinnar leyfðu sér að hafa aðra skoðun á einstökum málum en Sjálfatæðisflokkurinn. Þeir höfðu aldrei kynnst öðru eins.

Með hverjum degi sem líður koma frjálshyggju vinnubrögð Sjálfstæðisflokksins betur í ljós. Á sama tíma og þjóðfélagið var á floti í peningum, á meðan bankar ýttu auknum lánum að almenningi, á meðan þeir kölluðu sparifjáreigendur til sín og hvöttu þá til að taka meiri áhættu með því að fjárfesta í sjóðum og hlutabréfum og á meðan stjórnvöld sungu útrásaróð við texta sem saminn var í þessum sömu bönkum, þá var ekki greitt í varasjóði þjóðarinnar. Ábyrgðarsjóður launa er stórskuldugur eftir uppgangstíma, gjaldeyrisvarasjóðurinn nánast tómur og innistæðutryggingasjóðir sömuleiðis. Þetta hlýtur að vera dæmalaust.

Síðustu ár hafa varnaðarorð hagfræðinga dunið í eyrum okkar. Íslenskir hagfræðingar sem starfa hérlendir eða erlendis og erlendir hagfræðingar í búntum hafa reynt að vara stjórnvöld við. Ég man  ekki eftir einum einast hagfræðingi sem lýsti trausti á þessi galdraverk sem í gangi voru. Eins og títt er um galdra var þetta full flókið fyrir almenning, en stjórnvöld áttu að skilja viðvaranirnar. Þeim bar skylda til þess.

En eru ráðherrar ekki bara menn eins og þú og ég, menn sem ekki hafa sérþekkingu á efnahagsmálum? Auðvitað eru þeir það, en þeir eiga að hafa reynslu og þeir hafa aðgang að fjölda sérfræðinga í ráðuneytunum og stofnunum ríkisins (reyndar fór Davíðþá leið að reka bara þá sem ekki voru samþykkir honum). Þeir geta líka ráðfært sig við utanaðkomandi sérfræðinga og ýmsar nefndir eru skipaðar einmitt í þeim tilgangi. Ef efnahagsstjórnin byggist á ráðgjöf frá þessum hópum þá þarf heldur betur að taka til þar.

En þetta er ekki líklegt. Líklegast er að efnahagsstefnan sé byggð á ráðgjöf sem kemur frá einkavina- og sérhagsmunaneti Sjálfstæðisflokksins. Efstur á blaði er trúlega hinn geðþekki seðlabankastjóri Davíð Oddson með Hannes Hólmstein og Kjartan Gunnarsson á hæla sér. Þar fyrir utan hygg ég að flesta ráðgjafana sé að finna í hópi þeirra sem keyptu bankana, (matvöruverslunina), samgöngutækin og fjölmiðlana ásamt smáfyrirtækjum sem fylgdu með svo sem tryggingarfélögin, byggingarvöruverslanirnar og eldsneytisdreifinguna.

Það gengur hreinlega ekki að  Sjálfstæðisflokkurinn stjórni endurreisnarstarfinu.

Í mínum huga ber Samfylkingin litla ábyrgð á efnahagsstefnu síðustu 13 ára. En héðan í frá verður hún ekki stikkfrí. Það verður tekið vel eftir því hvað hún gerir og gerir ekki í þessari stöðu. Framtíð hennar til næstu ára og jafnvel áratuga verður mótuð á næstu vikum.


Við viljum kosningar

Þetta er allt dálítið öfugsnúið. Ég held að Vagerður Sverrisdóttir hafi staðið sig vel, - fyrir sinn flokk. Hinsvegar hef ég nánast alltaf verið ósammála henni þangað til núna. Ég er sem sagt sammála henni um að það eigi að blása til kosninga eins fljótt og unnt er.  T.d. næsta vor.

Staðan er þannig að Sjálfstæðismenn fara með embætti forsætis- og fjármálaráðherra, eins og þeir hafa gert í meira en 17 ár. Að mínu mati er það út í hött að endurreisnarstarfinu verði stjórnað af Sjálfstæðisflokknum. Það bara gengur ekki. Nú þarf ný viðhorf og ný vinnubrögð. Það verður að víkja sérhagsmunaneti Sjálfstæðisflokksins til hliðar um stund. 

Nú leita menn logandi ljósi að ráðgjöfum Sjálfstæðisflokksins undanfarin ár.  Ekki svo að skilja að Davíð Oddsson hafi talið sig hafa þörf fyrir ráðgjafa, en líklegast er að ráðgjafarnir hafi verið sömu mennirnir sem keyptu bankana, - og settu þá á hausinn. 


mbl.is Stjórnmálin biðu hnekki
Tilkynna um óviðeigandi tengingu við frétt

Magnað Silfur hjá Agli

Þetta var magnað Silfur hjá Agli í dag, einkum þó þættir þeirra Einars Más og Jóns Baldvins. Fátítt er að sjá spekinga og/eða rabbara mæta í þáttinn og vera svona mikið niðri fyrir. Reiðin í þjóðfélaginu er alveg mögnuð. Ég man ekki eftir öðru eins. Margir voru reiðir þegar Davíð ætlaði að setja prívat fjölmiðlalög í landinu en reiðin var ekki jafn almenn þá og nú. 

Það magnaða er að rekja má frumorsakir þessa ástands sem nú ríkir  til eins manns. Að vísu hafa margir tekið þátt í tryllingunni en í stjórnatíð Davíðs hefur aðeins einn ráðið. Aðrir hafa verið einskonar hestadrengir hjá honum en hann einn hefur alltaf ráðið förinni.


mbl.is Jón Baldvin: Seðlabankastjóri þvælist fyrir á strandstaðnum
Tilkynna um óviðeigandi tengingu við frétt

Enn ein smjörklípan?

"Stjórnvöld, fyrrverandi stjórnendur viðskiptabankanna og eftirlitsstofnanir eru á einu máli um að neikvæð afstaða erlendra seðlabanka til lánveitingar til Íslands hafi orðið íslensku bönkunum að falli. Augljóst hafi verið að erlendu seðlabankarnir höfðu samráð sín á milli um þessa afstöðu."

Að erlendir seðlabankar hafi fellt íslensku bankana virðist vera týpísk eftirá skýring eins og vænta má frá Davíði. Hann hefur alla tíð haft lag á áð búa til skýringar sem henta honum og sem varpa rýrð á aðra. Smjörklípuaðferðin. Erlendir seðlabankar eru ekki og hafa aldrei verið lánastofnanir fyrir íslenska banka. Íslenski seðlabanikinn er sá aðili sem ætti að hlaupa undir bagga með þeim og hefði vafalaust gert það ef annar en Davíð hefði verið þar við stjórnvölinn. En við fáum svo aldrei að vita hvort það hefði nægt.

Mínar heimildir segja að nú sé það Davíð sem aftekur alveg að leitað verði til IMF. Það virðist hinsvegar vera  eina færa leiðin. Erlendir seðlabankar hafa komið sér saman um að gera það að skilyrði fyrir aðstöð við íslenska ríkið, íslensku þjóðina. Sömuleiðis skilst mér að Davíð segi algjörlega nei við að endurreisnarstefnan verði sett á EB. Og það þorir enginn í Sjálfstæðisflokknum að setja sig upp á móti átrúnaðargoðinu Davíði.

Davíð er í augnablikinu mesti vandi íslensku þjóðarinnar. 


mbl.is Þeir felldu bankana
Tilkynna um óviðeigandi tengingu við frétt

Eigum við að ganga úr NATO?

Jörgen Jörgenson

Þetta er hárrétt hjá Samtökum hernaðarandstæðinga. Þarna er útgjaldaliður sem við getum sparað okkur án þess að við finnum fyrir því. Mér fannst að aldrei kæmu fram forsendurnar fyrir samningunum sem gerðir voru eftir að varnarliðið fór (loksins) og að sjálfsögðu fengum við enga almenna umræðu eða atkvæðagreiðslu um þær. Hver er hin aðsteðjandi hætta? Engan virðist hafa grunað að hættan væri frekar efnahagsleg en hernaðarleg og að ógnvaldurinn væri bandamaður okkar í NATO en ekki Rússar eða Arabar.

Fyrir 200 árum var landið hernumið af Jörundi nokkrum sem kom frá Bretlandi, árið 1940 var landið hernumið af Englendingum og eitt stríð höfum við háð, - gegn Englendingum. Ég geri mér grein fyrir að forsendur og aðstæður eru mjög ólíkar í þessum tilvikum, en að það skuli vera hægt að nefna England í öllum tilvikum segir samt einhverja sögu.

Sumir tala um að NATO séu slík friðar- og mannúðarsamtök að við verðum að taka þátt þess vegna. Erum við ekki ágætlaga í stakk búin til að sinna friðar- og mannúðarmálum og standa utan við NATO? Ég held það og sennilega gætum við verið áhrifameiri þannig.

P.S: Það er vert að rifja upp hvernig Davíð leyndi þjóðina því að herinn myndi fara á meðan hann háði kosningabaráttu. Honum fannst greinilega að þetta kæmi þjóðinni ekki við fyrr en honum sýndist svo. Enn eitt dæmið um hroka hans, óabyrga stjórnarhætti og rangt stöðumat.

 


mbl.is Vilja að hætt verði að bjóða erlendum her hingað
Tilkynna um óviðeigandi tengingu við frétt

Enn megum við gjalda í boði Sjálfstæðisflokksins

Það þarf ekki langt mál um þessa yfirlýsingu Geirs. Hún sýnir svo ekki verður um villst að Sjálfstæðisflokkurinn er ekki fær um að reka Davíð og koma skikk á stjórn Seðlabankans. Persónulegu vandamálin sem rúið hafa stjórn bankans öllu trausti bæði innanlands og utan verða því enn um skeið vandamál allrar þjóðarinnar. Sjálfstæðisflokkurinn er tilbúinn til að láta okkur blæða fyrir gömul og ný afglöp Davíðs sem eiga enn eftir að kosta okkur ómældar fjárhæðir auk þess vantrausts sem honum fylgir. 

Því fyrr sem stjórnarslit geta orðið því betra. 


mbl.is Ekki persónugera viðfangsefnin
Tilkynna um óviðeigandi tengingu við frétt

Hvolparnir hennar Lísu

Venni með snuð Ég hef átt hunda í um 17 ár. Þegar ég eignaðist fyrsta hundinn, Venna, var sonur minn 8 ára og mér fannst vanta eitthvað mjúkt á heimilið, enda var þetta bara tveggja manna fjölskylda. Þess vegna varð Collie hundur (Lassí) fyrir valinu. Reyndar var ákvörðunin tekin að hluta vegna þess að mér bauðst þessi hundur, en hvað um það, þá svínvirkaði þetta þriðja element fyrir okkur báða. Hundar eru aldeilis ótrúleg dýr. T.d. getur þú verið með sama hundinn á heitri sólarströndu og í trylltu vetrarveðri á Íslandi eða inni á heimili þínu mestan hluta dagsins en stokkið með hann út í frost og skafrenning án þess að hann þurfi nokkurn undirbúning. Sjálfur þarf maður að kappklæða sig og dúða.

Kolla og Lísa eru gegt vinkonur Nú á ég Border Collie tík (Kollu) sem, líkt og Venni, er loðin með langt nef og dökkbrún augu. Mér fannst alltaf að þannig ættu kósý hundar að vera. En þá kynntist ég Lísu. Hún Frænka mín er í hundunum líka. Hún á einn eiginmann, 2 dætur, einn hund (Timor) og 3 tíkur (Aniku, Birtu og Lísu). Þegar maður er með hund er alveg nauðsynlegt að eiga svona Frænku. Hún segir að það sé allt í lagi að passa Kollu mína. Það muni ekkert um einn hund í viðbót. En á móti fæ ég stundum að passa hundana hennar og þannig kynntist ég Birtu og Lísu.

Allir saman, - alltaf Ég hef ekki verið mjög spenntur fyrir Labrador hundum og þeir eru gjörólíkir Border Collie hundum. Border Collie hundar eru fremur kvikir og spenntir. Þegar ég skil Kollu eftir í bínum þá situr hún og horfir í áttina á eftir mér þangað til ég kem aftur. Labrador situr kannske smá tíma en fær sér síðan legging í rólegheitum. Hann er afar tryggur og af því hann er veiðihundur þá gengur hann við hæl þegar honum er sagt að gera það, ekki bara nokkurn vegin við hæl. Þeir eru sagði afar barngóðir, þola öll veður og ég hef séð menn koma með drulluskítuga hunda úr veiði og spúla af þeim á bílaþvottaplani. Bara gott það.

Er maður sætur eða er maður sætur En hundar hafa ekki síður einstaklings einkenni en kynbundin einkenni. Og Lísa er alveg í sérklassa hvað varðar skap og viðmót. Það er eins og hún sé alltaf brosandi. Og frábærlega hlýðin og vel vanin. Maður þarf aldrei að segja hlutina nema einu sinni við hana, enda margverðlaunuð bæði fyrir veiðimennsku og útlit.

Og nú á hún 9 gullfallega hvolpa með þessum svaka gæja sem heitir Tiger og er líka marg verðlaunaður. Þegar við bætist að Frænka og fjölskyldan er með hvolpana í fanginu mestallan daginn þá má búast við að þeir verði ekki bara fallegir heldur líka meðfærilegir og mannelskir einstaklingar sem eiga eftir að gleðja væntanlega húsbændur sína í mörg ár.

Til hamingju Frænka (og Guðjón), til hamingju Lísa.

Það eru 4 hvolpar til sölu þegar þetta er skrifað (822 7705)


Paul Krugaman og Þorvaldur Gylfason

A funny thing happened to me this morning … skrifar Paul Krugman á bloggsíðu sína The Conscience of a Liberal í morgun. Það hlýtur að vera nokkuð sérstök tilfinning að vakna við svona fréttir.

Paul skrifar dálk í NYT á mánu- og fimmtudögum. Hann er einn þessara manna sem geta talað um flókin mál á einfaldan hátt þannig að jafnvel ég get skilið, - eða held að ég skilji. Við eigum slíka menn á Íslandi. Þorvaldur Gylfason er einn þeirra en hann vitnar m.a. talsvert til Paul. Ekki veit ég hvort þeir aðhyllast svipaðar stefnur í hagfræði en Paul er klárlega frjálslyndur og skammast sín ekki fyrir það þótt umhverfið sem hann starfar í sé (BNA) sé haldið örgustu íhaldssemi.

Sennileg hefðu ýmsir hérlendir áhrifamenn haft gott af að lesa greinarnar hans Paul Krugman og hlusta með meiri athygli á Þorvald Gylfason. 

29. ágúst 2005 skrifaði Paul:

"How bad will that aftermath be? The U.S. economy is currently suffering from twin imbalances. On one side, domestic spending is swollen by the housing bubble, which has led both to a huge surge in construction and to high consumer spending, as people extract equity from their homes. On the other side, we have a huge trade deficit, which we cover by selling bonds to foreigners. As I like to say, these days Americans make a living by selling each other houses, paid for with money borrowed from China."

Kannast einhver við svipuð orð á sama tíma mælt á íslensku?


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband